ប៉ៃលិន៖ សមត្ថកិច្ចបានឲ្យដឹងថា កាលពីថ្ងៃទី ២៦ មករា ម្សិលមិញ ក្រុមយោធាវរៈសេនាតូចលេខ៥០៧ បានឃាត់​ពលរដ្ឋ៨នាក់ នៅ​ចំណុច​បរ​ថ្មី ក្នុងភូមិបរតាំងស៊ូ សង្កាត់បរយ៉ាខា ក្រុងប៉ៃលិន គ្រាដែលពួកគេបានចូលកាប់ឈើ នៅតាមបន្ទាត់ព្រំដែនខ្មែ-ថៃ  ដែល​ពុំទាន់​បាន​កំណត់​ត្រឹម​ត្រូវតាមច្បាប់ (តំបន់ស)។

លោកវរៈសេនីយ៍ត្រី ស៊ីម រុន នាយសេនាធិការ វរៈសេនាតូច៥០៧ បានឲ្យដឹងថា ការដែលកម្លាំង​របស់លោក​ឃាត់​ខ្លួន​ប្រជា​ពលរដ្ឋមកអប់រំ ព្រោះ​នៅតំបន់នោះ ជាតំបន់មិនទាន់ច្បាស់លាស់ និង មិនទាន់កំណត់​ព្រំប្រទល់​រវាង​កម្ពុជា​-ថៃ នៅឡើយ ហើយ​ខាង​ភាគី​ថៃ​តែង​តែ​ដើរ​ល្បាត​ និង ជាញយដងបានចាប់ និង បាញ់គំរាម ទៅលើ​ពលរដ្ឋ​ខ្មែរដែលឆ្លង ទៅទីនោះដែរ។

ជាមួយគ្នានេះ លោកក៏បានធ្វើការអំពាវនាវ ដល់ពលរដ្ឋទាំងអស់ កុំចូលទៅទីនោះ ដោយ​រង់​ចាំ​ខាង​គណៈ​កម្មការ​ព្រំ​ដែន​ នៃប្រទេស​ទាំង​ពីរ​ធ្វើ​ការ​ដោះស្រាយ និង កំណត់ព្រំដែនច្បាស់លាស់សិន។

យ៉ាងណាក៏ដោយក្រុមពលរដ្ឋដែលត្រូវបានឃាត់ខ្លួននោះ ត្រូវ​បាន​អនុញ្ញាត​ឲ្យ​វិល​ត្រ​ឡប់​ទៅផ្ទះវិញ បន្ទាប់ពីធ្វើការអប់រំ ៕

ប្រភព៖ ann.com